الثورة وسنينها!

سد أثيوبيا سيسبب مشاكل خطيرة لمصر. سد أثيوبيا ليس له تأثير على مصر. البعثة الشعبية تنجح فيما فشل فيه النظام السابق! دولة الفرس ترى أنه “لا مانع” لديها من إعادة العلاقات مع مصر!! الوفاق الفلسطينى تم فى يوم وليلة بفضل الثورة! فتح معبر رفح بعد أخذ ورد مع أذناب دولة الفرس .. قيل: الله! ما هو كان مفتوح ياجماعة! قالوا ـ تحلية بضاعة ـ لأ ما هو الآن مفتوح بصفة دائمة ـ يعنى إيه؟ .. يعنى 8 ساعات فى اليوم ومغلق أيام العطلات الرسمية! والنبى إيه؟!!! والوجوه القبيحة التى كانت مخلب قط للتآمر على مصر يحضرون إلى مصر ويقدمون “النصائح”!!! هيييييييه .. مليونية!
من أصدر الإعلان الدستورى لا يفقه شىء! إنتخاب مجلس الشعب قبل الدستور باطل! إنتخاب الدستور قبل الرئيس حرام! تعديل مواد الدستور ـ الذى كان أول مطالب أو تقريبا المطلب الوحيد للأحزاب ـ غير دستورى!! الإعلان الدستورى عظيم آخر حاجة! إنتخاب الرئيس الأول. لأ، انتخاب رئيس الوزراء الأول. لأ، إنتخاب الدستور الأول! لأ انتخاب اللجنة التى ستؤسس الدستور الجديد الأول! لا داعى لمجلس الشعب! لأ، لا داعى لمجلس الشيوخ (أحيانا يسمى مجلس الشورى)! لا داعى للقائمة! لا داعى للإنتخابات! ياللللللللا مليونية بأه.
رئيس الولايات الأنتيكية الذى كان يرجو أن يقوم “شباب الثورة” بتعليم الشباب الأنتيكى، يحيى شباب بولندا ويرجوهم “نقل خبراتهم” الثورية إلى الشباب المصرى! وهذه يلزمها مليونية اسمها “لا للضحك علي ذقوننا”!!
شباب الثورة يحتفل بالثورة فى فرنسا!! شباب الثورة يحتفل بالثورة فى نادى الليونز! شباب الثورة فى الولايات الأنتيكية! شباب الثورة يشترك فى البعثات الشعبية (ليس فقط إلى أفريقيا)! شباب الثورة يشترك فى الحكومة ورئيس الحكومة يقترح تخصيص مكتب فى مقر الحكومة للشباب!!! وبين هذه النشاطات ربما ننظم مليونياية على القد كدة علشان الحبايب!!
الجيش يحمى الثورة .. الثورة تحب الجيش .. الجيش يتباطأ! القضاء موالس! القضاء نزيه!! القضاة زوروا الإنتخابات! القضاة أحسن ناس!! المجلس يعقد لقاءات مع القوى كلها لاستطلاع الرأى قبل إصدار قرارات مهمة! لأ، الجيش ينفرد بالقرار! الجيش قليل الأدب! الجيش والشعب إيد واحدة!! المشير ينفرد بالقرار!
عصام شرف هو الأحق من أحمد شفيق! الحكومة ضعيفة! الحكومة ثورية! الأهالى يقطعون خط السكة الحديدية! إنفراجة فى مشكلة المياه بفضل زيارة واحدة من رئيس الحكومة. تغيير الوزراء وتغيير رئيس الوزراء على مزاج بعض الأصوات العالية والهتافات المدروسة! وأنت قلت لحسنى مبارك صباح الخير إذاً فأنت مرجوم ومنبوذ. الوضع الإقتصادى خطير! الوضع الإقتصادى عال العال! الإستثمار ينهار! الإستثمار بخير! المستثمرون ينتظرون بفارغ الصبر ليحضروا إلى مصر!
كل ما تقدم هنا ليس هزلا .. ولكنه حقيقة .. وهى مقتطفات سريعة لبعض ما سمعناه وقرأناه كل يوم وكل ساعة وسنسمعه وسنقرؤه دوما .. مع جزيل الشكر لإعلامنا الموكوس ولا فرق بين القومى والخاص والمأجور.
وعندنا والحمد لله خبراء قانونيين: مستشارون يتهمون مستشارين بأنهم لا يفقهون شيئا. وعندنا أيضا والحمد لله خبراء فى المياه فى كل الأماكن والمناصب ماعدا فى وزارة الرى!! والشعب كله أصبح خبيرا فى الإجراءات الجنائية وواحد صايع يرفع لافتة تندد بالقاضى وتسأله “هم هددوك والا إيه؟” ويريح قاضى آخر نفسه من هذه الضوضاء فيحكم بالإعدام .. وخلاص .. أفضل من تحطيم المحكمة إذا لم يعجب الناس بالحكم!
………..
سؤال: حد فاهم حاجة؟
وقبل ذلك سؤال أهم بكثير:
هل تستطيع أن تخبرنى بخمس أسماء لعملاء (سواء عن جهل أو عن خيانة) من أعضاء الطابور الخامس؟ أو حتى إسمين .. أو حتى إسم واحد؟ ومَن منهم يسمى نفسه “شباب الثورة”؟
………
“أرى أن النخبة السياسية ـ ممثلة فى قادة وأعضاء الأحزاب والمفكرين والناشطين من شباب الثورة ـ تقاعست ولم تقم بواجبها كما ينبغى، وكان موقفها أقرب إلى حالة إعتراض بلا عمل!”
هذه الجملة جاءت فى معرض مقدمة مقال جمال محمد غيطاس بعنوان “السلطة لم تغلق باب المشاركة والنخبة السياسية تقاعست” وهذه الجملة تلخص الحالة الحالية، ولكنها لا تغنى عن قراءة المقال الهام كاملا وبعناية. وتجدونه هنا:
http://www.ahram.org.eg/549/2011/05/30/51/81027/219.aspx

أنا ماحستش بالتغيير

أنا ماحستش بالتغيير .. عشان كده نازل التحرير!
كتب م/ أشرف فهمى:
بيقولك بقي ايه أنا محستش بالتغيير ونازل تاني التحرير طب بالله عليكم فيه حد فينا يقدر ينكر كم التغيير الجميل اللي أحنا فيه وحجم الكوارث اللي أحنا فيها حملة الشحاتة من دول الخليج منفعتش وأمريكا قالت فوتوا علينا بكرة وربنا يحنن عليكوا والفاو بتقول ان مصر ستواجه أكبر مجاعة ومفيش أنتاج ولا فلوس حتي علشان ندفع للمزارعين حق توريد القمح ومفيش سولار ولا بوتجاز ولا امن في البيوت والشوارع والبورصة متنيله بستين نيله والسياح قالوا يا فكيك سيبك من البلد الخربانه دي ومفيش مستثمرين ولا استثمار وحجم الاحتياطي دخل الانعاش المبكر وشباب الثورة قاعد في مجلس الوزراء وبيبعت لكافة الوزارات كشوف بأسماء لازم يعينوها والا حننزلكوا في التحرير ونطلع عين أهل اللي جابكوا وأصبحوا هم أنفسهم أسوأ من من العهد السابق وتحولوا الي ديكتاتورات مقننة وأصبحنا عايشين مع الخوف وعدم الامل في بكرة لغياب الوعي وانتشار الجهل والبلطجه ولا اقصد بلطجة الخارجين عن القانون ولكن بلطجة شباب الثورة وبلطجة القري في الصعيد وغيره وبلطجة المطالب الفئوية وبلطجة المسلمين والمسيحيين وبلطجة الاعلام وبعد كده قال أيه عاوزين نروح سيرا علي الاقدام (علشان مفيش سولار للاتوبيسات ) لاسرائيل علشان بقي أيه نحتفل بيوم النكبة ونحرر الاراضي ولكن الحمد لله قبضنا علي جميع زبانية النظام وحتي حفيد حسني مبارك تم رفده من المدرسة وأصبح في الشارع بلا تعليم وكأنه أختار أبوه وجده وتحيا الثورة المجيدة ومبروك علينا اليكتاتورات الشباب العترة اللي كله رجولة وشهامة وخوف علي البلد وكنت عاوز أقترح عليهم أن يكون التجمع يوم الجمعه في ساحة المسجد الاقصي يا تري رايكم أيه؟؟؟؟؟؟؟؟؟؟؟؟؟؟؟؟؟؟؟

تعليقى:
طب إذا كان هو ما حسش بالتغيير .. فهل دى كانت غلطته هو؟ والا ………….. غلطة اللى كان بيغير له فى التحرير؟ وهل من الثورية الشرعية الديمقراطية الدستورية ـ إذا لم يكن يحس فعلا ـ أن لا يخبره أحد بأنهم غيروله؟

تعليق من م/ أشرف فهمى:
أزي حضرتك يا ريس والله أنا شايف ان مفيش أحساس اساسا ده أولا وثانيا مين حيقول لمين لان الكل دلوقتي بيتكلم في نفس الوقت وفي اي حاجه وبألف لغة ومحدش فاهم حاجه في أي حاجه بس في نفس الوقت كل واحد بقي أبو العريف وعدم الفهم في حد داته مشكلة ولكن المشكلة الاكبر في عدم المعرفة كمان تخيل بقي حضرتك ناس مش فاهمه بس مش حاسه ومش عارفه أنها مش فاهمه وفاكره انها فاهمه وكمان مش عارفه بس برضه مش حاسه ومش فاهمه أنها مش عارفه بس هي فاكره انها عارفه ,,,,,,,,,,أنا ثورجي أدن أنا مش عارف ومش فاهم ومش حاسس ومش عايز أشتغل وبعد أدنك بقي لازم أستعد من النهارده علشان جمعة عدم الاحساس مش هو ده اسمها ؟؟؟؟؟؟؟؟؟؟؟